Thule Air Base-mi Greenland Heritage Week-ertitsineq

Qaasuitsup Killeqarfia (polarcirkel) qaangingaatsiarlugu Thule Airbase-mi sulisut ukiumoortumik festival-ertitsisarput qaammaterpassuit taarnikooqisut naalersut upernaarlu takkutilersoq nuannaarutiginiarlugu. Ukiut 40-t sinnerlugit arnat angutillu Air Base Group nr. 821-iminngaanneersut kalaallit qaaqqusarpaat “Greenland Heritage Week”-imut. Ulluni pingasuni ataatsimoorsuaarnermi Kalaallit thulemilu sulisut ileqqutoqqanik paarlaateqatigiittarput, assassukkat suliarinikuusatik takutissorlugit nereqatigiillutillu. Arfininngormat anorersuaraluartoq sapaatiummat Greenland Heritage Week-imut ilaasussat tamarmik ilaapput.

Kalaallit assassorlutik suliarinikuusaminnik tuniniaammata 25.000 inik isertitsisimapput illoqarfimminut. Kisiannili pissanganarnerpaaq pisoq tassaavoq qimussimik sukkaniuuttoqarmat. Marcus Hansen (assimiittoq) ajugaavoq, 10 km-erpoq minutsit 25-iinnaat ingerlanerani, ilaasut allat 16-it qaangerarlugit, 11-inik ukiulik ilaanikuni oqaluttuarisaanermi nukarlersaaq ilanngullugu.

Ukiormanna Kalaallit 63-it peqataapput festivalimi, piniartut 17-it qimussimik sukkaniuunniarlutik aggernikut ilanngullugit. Festivalimut peqataasut utoqqartaat tassaavoq 78-inik ukiulik Qaerngaq Nielsen, Savissivimmeersoq. Thule Air Basemi festivalit tamangajammik ilaaffiginikuuai tulluusimaaqalunilu oqarsinnaalluni qimussimik sukkaniuuttuni arfineq pingasoriarluni ajugaanikuulluni. Qanoruna ililluni taamak ajugaasaqattaartarsimasoq? Qimmiminut “Nanoq!”-mik nilliasarsimavoq qimmiutai sukkanerusumik ingerlaniassammata. Meeraanermiik piniartuuvoq, siullerpaamik puisimik pisaqarsimavoq arfiniliinnarnik ukioqarluni qimminillu sungiusaasarsimalluni 13-inik ukioqarnerminiit. Qaerngaq Oberst Hanson-imut immikkut qujassutissaqarpoq oqarlunilu meeqqat ukiunik tulliuttunik eqqaamasassaqartikkai nuannersunik.

Qujanarujussuaq Thule Air Basemut festivalimut peqataasunut. Ukiup tullianimut qilanaaqaagut takoqqinnissassinnut!